TIGSIK

Coach: Mrs. Marilyn B. Badian

Dios marhay na aldaw sa saindo

Mga maestra, bisita asin eskwelang arog ko

Lalo na ining mahusgar samong nasa entablado

Mga dekalibreng hurado na nasa atubangan ko

Paggalang sa gabos sakuya ining itinatao.

Tigsik ko ining okasyon ta

Iba-ibang klase an mahihiling sa programa

Pagkanta, pagbayle, plawta pati man banduriya

Ini mga kultura sa Bicol na satong minana pa

Kabale an tirigsikan na siguradong mangisi kita.

Tigsik ko ining mga tawo

Aldaw, banggi, nagpapangadyi asin nagrorosaryo

Nin huli sa kasalan na saimong naginibo

Dios na maherakon, kon udok sa boot an hagad mo

Grasya saiya man itatao, basta magkumpisal kamo.

Kahobenan sa tigsik kamo man igwa

Kaidto alas sais dapat nasa harong kana

Pagpangadyi nin “Angelus” dapat bilog an pamilya

Uni kamo sa kalsada, cellphone an kapot sungsong pa sa talinga

Apod ni Nanay dai madangog, kaya kudot an saindong nakua.

Tigsik ko ining mga daraga

Pagka Maria Clara mayo na sa isip ninda

Ngonian an gubing halipot na, hiling si panty pati saiyang bra

Mga nakahiling burikat na si mata, an huna artista sa pelikula

Kaya mga magurang na anggot napa susmaryosep na sana.

Tigsik ko ining kapistahan sa rehiyon

Nuestra Señora de Peñafrancia an patron

Gabos nagrurokyaw ki Inang mamomoton

Huli ta kita igwang panata asin man debosyon

Kaya an kurahaw “Viva la Virgen” sa misa asin prosisyon.

Tigsik ko man an kapistahan sa baryo

Tradisyon dai nanggad ini nababago

Pag-andam sa okasyon pirming preparado

Igwa lang ipakakan sa bisita maski ini dai birestado

Ini mga inutangan pa sa Bombay na 5/6 an porsyento.

Tigsik ko sakong tinatapos na

Nganing tawan kong dalan ining mga kaibanan ko pa

Isipon nindo an mga marahay-rahay sana

Ini an matao nin kaogmahan ta

Kaya  an walat ko “Dios Mabalos mga kahemanwa”.