T I G S I K

Ginibo ni: Mrs. Marilyn B. Badian

Dios marhay na aldaw sa saindo

Mga eskwela, bisita, maestra asin maestro

Magurang man o opisyal kan eskwelahan asin munisipyo

Respeto sa lambang saro sako ining itinatao saindo

Ini an kultura na sakuyang minana sa mga ginikanan ko

Tirigsikan saro sa programa ta ngonian

An tema kultura sa lugar kan mga pinaggikanan

Saro na digdi an lugar niato na kinamundagan

Si San Isidro o Oras an pangaran kan lugar

Kon ano, paano, saen ini naggikan satuya nang maaaraman

Tigsik ko ining Oras o San Isidro

Apod sa lugar kan enot pang mga tawo.

Ini saro sa barangay kan Baao kon hahanapon nindo

Baao na ginikan man kan enot na Pilipinong Obispo

Na orgulyo niato bilang sarong Baaoeño

Tigsik ko ining pangaran na Oras

Ini gikan sa tinanom arog sa kawayan an lawas

Digdi sa sityo ni San Isidro nagtubo an hawak

Tinanom nahihiling sa kadlagan o maski sa natad

Digdi ipinangaran an Oras na sarong grasya nin Diyos na saiya man ipinagwaras

Tigsik ko ining tinanom na Oras

Dakula an katabangan kaini sa komunidad

Sa kadikluman ini an gamit ngarig magliwanag

Sa harong man o sa prusisyon ini an saindang pinapalaad

Huli ta kaidto mayo pa man nin kuryente o elektrisidad

Tigsik ko ining lugar na sakong pinaggikanan

Ining Barangay San Isidro o Oras iyo tang kinamundagan

Kaidto paggibo nin sawali, omahan an pinagkakasiributan

Ngonian manlaen-laen nang negosyo pati manukan yaon na man

Huli sa diskarte sa buhay mga tawo digdi nagin nang mga mayayaman

Tigsik ko man ining Orastigon

Ini an apod sa tawong nageerok sa sityo ni San Isidro Labrador

Sa higos asin tibay kan mga tawong magtupad nin obligasyon

Pati pagdebosyon ginibong duwa an prosisyon

Mahiling lang an paggalang asin pagrespeto sa satuyang patron

Tigsik ko sakong tinatapos na

Ginikanan niato satuya ining giromduma

Mga kultura tang padikit-dikit nang nawawara

Importante ini sa buhay na dapat balikan ta

Kaya an masasabi ko Dios Mabalos na sana